於元朗福康街乘搭36號專線小巴就可以直達大生圍，總站係大生圍村 村公所，車程只需15分鐘左右。
途中見到有路牌指向南生圍，大部分乘客都會係途中落哂車，由於我地都唔太確定實際位置，小巴司機見我地一臉茫然既樣，問一問我地其實係去邊，司機叔叔都話大生圍係比較少人去，都係以南生圍為多。
好快~~就去到我地既目的地——大生圍 啦。一落車右邊有個小涼亭及公廁，左邊就係村公所，有四位鄉親父老打緊馬吊，正前方就係村既入口。
黎到大生圍有種番左去「舊陣時」既感覺，完完全全既農村鄉下味道，以長者為多。屋只有一至兩層，門前有個小空間外面有圍欄圍住。其中有部分甚至會打通兩邊通道放置電視機、梳化等等傢俱，好多戶都會打開大門或者坐出門外小空間乘涼，感覺上係似陸地版既大澳。
村內大致寧靜，基本上只會聽到屋入面傳出黎既電視聲、收音機聲、小朋友玩鬧、老人家乘涼閒談聲，怕騷擾到村民，我地都會壓低聲量。
一路向前行，到達 公廁 (2) 號，呢個時候有3條路可以揀，三條路都可以睇到唔同景色既魚塘。
我地先向左邊行，當時時間大約下午4點幾左右，太陽都係好猛烈，魚塘中間有一大片草叢，太陽照射落去綠油油一片心情立刻舒暢哂。
旁邊有個小涼亭有圍欄圍住，望入去入面係一片菜田，雖然圍欄冇完全關上，但始終係人地地方更加唔會隨便入去搞搞震，係外面影左兩張相就走了。
魚塘另一邊有條小路可以繼續向前行，會黎到一個小工地，地下全部都碎沙石，有間荒廢既小屋同一部挖土機，未知係咪準備清拆。
比較特別既係一個以木板搭建既小碼頭 (冇錯我相信佢係碼頭!!!) ，唔知點解諗都冇諗就行左出去，但其實木板有多個地方已經折斷，踩上去既時候感覺到唔係十分穩陣...
右邊再有一條小路可以繼續向前行，頭頂全部都係樹，仔細睇係一粒粒類似紅桑子既植物，繼續向前行，前面係好多好多好多好多蚊同飛飛!!!!!!!! 見到遠處有一個個黑色垃圾袋，估計都係俾村民臨時棄置垃圾用。但再望遠少少仲有一個大水塘，唔心息既我決定行番出去穊兜第二條路人入去。
第二條路亦即係頭先由 (2)號公廁 向前一直行既路段。 呢段路便便味道較重，因為村民係路既兩旁種左好多唔同既野。 有菜、花、仲有大大個梨!!! 相信村民都係用天然肥料施肥，亦即便便，行過可能要忍受一下，除此之外當然都仲有好多蚊同飛飛~~~~~~
盡頭亦都係一大片魚塘景，呢條小路左右兩邊都係魚塘，左邊比較接近太陽，太陽照落水面閃閃發光~~~
而右邊就可以影到藍天白雲~~~好靚呀<3
仲有大半個鐘先日落，於是番番去村口既更亭坐低休息一下~~ 呢個時間好多小朋友放學番屋企，好想知道佢地係個小村既生活同係市區既分別有幾大呢!?
差唔多時間就起行，同樣都係行番到公廁 (2) 號，但今次係向右行，只有一小段路就到塘邊。
呢邊既小路同樣都係左右兩邊都係池塘，臨近日落時間，大大個鹹蛋黃就係面前，但由於不停有魚游黎游去，太陽反射到水面變左一個橢圓形，冇辦法影到兩個太陽。右邊既魚塘對岸有一排小屋，太陽唔係直接照落黎，反而可以影到有類似天空之鏡既感覺。
5分鐘左右，太陽就消失左啦。 呢到只係魚塘只唔係海邊，自然唔會見到太陽係海平線消失，但係呢個咁寧靜既小村入面睇日落，都有另一種感覺~~~~
最後再次行番出村口，天色已經漸暗。 村公所旁邊有一個小公園，等小巴出番元朗市中心既期間，我地去左小公園行左個圈，入面有4隻貓貓懶懶閒地訓緊教~~~zZZZZzzZz 好有趣既地方係，旁邊有個告示牌寫住 「嚴禁携犬入內」，但反而有4隻貓貓係入面~~ 雖然唔太有關係但成個畫面好可愛 XD
/////////////////////////////////
元朗大生圍
前往方法 : 元朗福康街 乘搭36號專線小巴
記住!!!! 帶蚊怕水 !!!! 飲品 !!!!!!
>>入面真係好多蚊~~
>>同埋冇地方買野飲,食物架~
沒有留言:
張貼留言